怀孕必须戒咖啡？孕妇实测Starbucks低因咖啡

　　“我向来每日一杯咖啡，依家无得饮好唔惯！”阿Man系我中学同学，几个月前有咗，对于要限饮咖啡觉得好难过。

 

　　当时我轻描淡写建议佢饮低因咖啡过口瘾，无谂过佢因为我一句话而做咗唔少功课，后来仲揾埋我，针对市面上咖啡做咗个小调查。外国好多连锁咖啡店，会将饮品嘅营养及咖啡因列喺网站，但香港并唔常见。

 

　　上个月阿Man透过电邮和电话联络连锁咖啡店Pacific和Starbucks，以及专卖咖啡粉囊嘅Nespresso，表明自己怀孕，希望了解几款常饮咖啡（包括低因咖啡）嘅咖啡因含量。

 

　　其中Nespresso最有效率，即日电邮咗各种产品嘅咖啡因列表畀我哋参考。原来现时Nespresso所售嘅20多款咖啡粉囊，一般每粒含59-99毫克咖啡因（除咗一款叫Kazaar特别高，一粒有142毫克），基本上日饮一杯都唔会超出孕妇建议摄取的上限200毫克；另有4款低因咖啡粉囊，每粒咖啡因含量都唔超过4毫克，睇完自觉饮得放心。

 

　　另外，Starbucks亦回覆，一份Espresso约有75毫克咖啡因，而一杯Tall size嘅Latte或Cappuccino都含有一份Espresso，即系都有约75毫克咖啡因；但留意，如果你叫Grande或更大杯就含有两份Espresso，一杯已有约150毫克咖啡因。

 

　　改饮decaf（低因咖啡）又点呢？一份只有约3毫克咖啡因咋！阿Ｍan话佢以前好钟意饮Starbucks嘅每日精选咖啡，但原来Tall size已有约195-270毫克咖啡因，依家都系唔饮为妙啦。

 

　　至于Pacific，上个月佢哋回覆暂未有相关数据，希望今个月取得报告再同我哋分享，期待收到佢哋嘅消息。